token Freedag, de 01. August 2025 is van 19 Ühr hento sowat 21 h weer ´n Klöön-Avend in de Oll Boo van de Leezder Möhlen, wi hebben dann "Berend de Vries un sien Wark" bi ´t Enn.
Berend de Vries is een van de bedüdendsten Dichters in Oostfreesland west. He is an de Olljahrsdag 1889 as Söhn van een Sailschippkaptein in Emden upstahn un ok - 1959 - in Emden overleden. Berend wull ok to See fahren, man sien Vader hett hum bedüdd, dat dat to de Tied neet good was, wieldat heel vööl Schippen jüst to de Tied unnergahn bünt, dat was de Tied, in de Sailschippen un Dampschippen um de Heerschupp ringen deen. So is he bi d´ Riekspost in de Lehr komen.
Man de Leevde to de See hett alltied bi hum anhollen un he hett anfangen, Gedichten un Vertellsels in Förm to brengen, dat was in Hoogdüüts, de oostfreeske Verleggers troten sük neet, plattdüüts Boken heruttobrengen. Na de eerst Spoods (Erfolge) van sien froog Boken hett he dann doch ok wunnerbaar Gedichten, Vertellsels, Balladen ok in Platt herutgeven. Vööl is in Kalenners, Bladen (so as Krier of OZ), in Manntsheften usw. ofprennt worden. Sien bekenntste Book is "Dat Schipp Mannigfual" worden, waar he neet blot de mooi Sieden van Wadd un Meer, man ok dat hart Leven un de stuur Schicksalen in Oostfreesland beschreven hett. Ok de Humor kummt neet to kört.
In Emden is de Dichter utbombt worden, he hett do ´n Settje in Nörden leevt (Am Zingel),´n heel Bült Saken van hum sünd daarbi verloren gahn, man he kunn sien Ollens Huus in Emden weer hoogtrecken.
Mit anner Schrievers hett he sük alltied good verstahn. so is he Baas van mennig Verenigen worden, he hett de Klaus-Groth-Pries för sien nederdüüts Lyrik kregen, dat Bundsverdennstkrüüz un he ist Ehrenbörger van Stadt un Eiland Börkum worden.
De Heimaatvereen Leez versörgt uns - as alltied - weer mit Tee un Geback un stellt uns sien Rümten to Verfögen, daaför geven wi geern weer een Gaav an de Vereen.
Ik will hier ok al to weten geven, dat in d´ Septembermaant keen Klöön-Avend ansett word, wieldat wi meest all dann up Tour na Danzig bünt un in Oktobermaant is de Klöön neet an de 03rd Oktober, wieldat dat ´n Fierdag is, wi bemöten uns dann an de 10. Oktober un willen dat Jeverland vörstellen.
Mit beste Gröten, ok in de Naam van de Plattdüütskring van Heimaatvereen Nörderland,
Jo Adolf Sanders
Keine Kommentare:
Kommentar veröffentlichen