Leev Plattfrünnen,
wi mussen de för vandaag vörsehn Platt-Avend wegen de Fierdag up de token Freedag verleggen, dat is dann de Freedag, 10.10.2025, 19:00 Ühr (hento 21:00 Ühr). Wi hebben dat Thema "Jever un dat Jeverland". Daar word natürelk vööl over dat Frollein (´n Adelsbeteken, dat betreckt sük neet daarup, dat se lössbannig weer) Maria proot un over de Geschicht, dat dat Landje maal to Russland höört hett.Dat Jeverland hett ok in de oostfreeske Geschicht alltied ´n Sünnerrull spöölt. Van d´ Landschupp her, van de Fresen, de daar wohnen, van de Seeroveree, van de See-Inbröken (Harlebucht, Jadebusen), sülmst ok van de Spraak hett dat haast nooit ´n groot Unnerscheed geven. Man uplesst hett dat doch, - ok dör de Grootheid van de Cirksenas - dat Frollein Maria klaar kregen, hör Landje an de Ollnbörgers to verarven. De hebben de Kans utnützt. To dat Jeverland höört dat Wangerland, Rüstringen, Östringen un toeerst ok Freeske Wehde un dat Freebörgerland, ja ok dat Eiland Wangerooge un all de in d´Jadebusen unnergahn Dörpkes.
Wilhelmshaven is dann up Ollnbörger Rebett van de Prüßen gründt worden, man de Verwalten gung van Oostfreesland ut (Wittmund), wieldat dat do al to Prüßen hören dee.
Waar wi nu unnerkomen, weet ik neet heel genau, mien Weten is, dat de Heimaatvereen Leez sülmst de Oll Boo bruken deit un wi in de Teeköken van de Möhlen utwieken mutten. Dann hebben wi dat Problem mit de eng Trappen.
Bit denn,
Jo Adolf Sanders mit de Plattdüütskring van Heimaatvereen Nörden
