Platt-Klön in Leez

Leev Kulantjes,

token Freedag, de 07. 09. 18 is weer ´n Klön-Avend ansett in de Teeköken van de Leezder Möhlen, 19,oo Ühr (hento 21,oo h). Uns Klön sall ditmaal gahn over ´Kleer un Kledaasje in froger Tieden´. Dat sall jüst neet um middelollerske Kledaasje wesen, mehr um dat, wat wi meest all noch sülmst beleevt hebben.

Dat wassen/weeren faak ut Wull breide Saken, so as Hosocken, lang Strümpen, Bostrocken, Troyers, Sweters, Büxens, Unnerwask, Nachtwask usw., ok Vadervermoorders, stiev Kragens, Manschetten – beter Saken, t. Bsp. Sönndagskluften, mooi Kleer för de Frolü, Mantels un Wemels, Joppen, Mannlübüxens un mennigmaal ok Warkkleer wurden van Snieders of Naihsterskes maakt. Mennig Huusfro un ok dat Volk in de Huushollens satten savends to breien, to naihen, to stoppen, flicken un to utbetern binanner – un dat swaar Tüüg muss ja ok wusken un pleegt worden. Dat was hart Arbeid. Kinnerkleer wurren van een na d´ anner wiedergeven un faak ok ut Saken van vullwussen Mann- un Frolü produzeert un ofwannelt. Plünnenrieters trucken van Dörp to Dörp un van Plaats to Plaats un boden Stoffen, Dragseelen, Knopen usw. an. Winkels un Ladens geev dat blot heel minn, van d´ Stang wurr haast nix haalt. Ok Hoden, Klappzylinners, Klotten, Pools un Pelzen un sowat mussen ja na de Lühen brocht worden. Nettso was dat mit Schohwark,  Steevels, Klumpen u.ä., de wurren van Schohmakers un Klumpenmakers anmeten. Ik lööv, daar gifft dat ´n Bült to vertellen un seker ok faak wat to lachen.

As alltied smieten wi ok weer ´n lüttje Gaav in de Pott för de Heimaatvereen Leez, de uns Tee, Backreev un de Ruum to Verfögen stellen – un dat bruukte Goodje ok weer schoon un schier maken. Ik frei mi up Jo

Jo Adolf Sanders