Platt-Klön-Avend

Leev Mitstrieders,

al weer is een Maant rum, vööls to gau, un al weer steiht een Klön-Avend an in de Teeköken van de Leezder Möhlen. Dat sall wesen an de token Freedag, de 05.10.2018 – Klock 19,oo Ühr (hento 21,oo h). Proten willen wi over de plattdüüts Theaterklottjes. Haast in elke lüttje of groot Gemeend gifft dat suckse Spölscharen, de sük alltied vööl Meite geven un de Tokiekers Plesär maken. Meesttieds bünt dat Lustspölen, de Lü wünsken sük wat to Laggen. Man dat gifft ok eernsthachtige Stücken, de Stöön geven för Olldagsproblemen. De Utwahl is neet so heel licht, un de lüttje Klottjes könen sük eernst Stücken blot hen un weerdenn wagen.

All Theaterstücken kösten Geld, wenn se upföhrt worden, de Spölers sülmst kriegen nix daarför, man de Vereen mutt dat ok schieren un overleeven könen un dat nödig Kleengeld weer rinhalen.

Eenigen van Jo spölen ja sülmst in suck Klottjes mit, weer mooi, wenn Ji ut Jo Sinn un Gedachten wat bidragen könen un dat Utproten daarover in Gang hollen könen. Un wenn dat wat to Laggen gifft, dann hebben wi ok all uns Plesär daaran.Van Doc Briese un ok van mi ut, wullen wi noch maal heel düchtig Dank seggen, för de mooi Leesnamiddag in de Rummel van dat Oll Raadhuus in Nörden in d´ Septembermaant. Daar worden wi ok nu noch mennigmaal drup anproot, ionum, dat de meesten dat best höögd hett.

Jo Adolf Sanders