Leev Plattdüütsfrünnen,
´t is al weer so wied, uns Platt-Klön April 19 steiht an. Dat is – as alltied – weer in de Teeköken van de Leezder Möhlen token Freedag, de 05. April, Klock 19 Ühr (hento hoogstens 21 h). Wi willen uns Schooltied weer upropen: “Wat wi Moois un Malls beleevt hebben, wat wi utfreten hebben – un wo uns Mesters daarup anslaan hebben”. Ik denk, daar kann weer elk un een wat to bidragen, wi mussen ja all mitnanner eenstmaals na d´ School hengahn – un so mennigwat is nu, waar dat al Jahren torüggliggt, mit Smüstern un Gnifflachen weer up d´ Tafel to brengen. Ik freei mi daar al up. Kraamt man mit allmann in Jo Bregen rum un haalt all dat to ´n Vöörschien, wat Ji al faak maal vertellen wullen. An d´ Enn geiht weer ´n Tellerke rum, um dat de Heimaatvereen Leez kien Schaa daarvan hebben sall. De stellen uns ja smaals de Ruum to Verfögen un versörgen uns mit Tee un Kookjes.
Uns DocBriese hett mi noch updragen, al maal weer up de Plattdüütsmaant September hentowiesen. Dat is - bit daarhen - wall noch ´n bietje Tied, man elk kann dat ja al maal in sien Achterkopp warken laten. Dat Rebett is “Familienfier (Familjenfier)” un dat steiht unner dat Richtwoord (Motto) “Platt boot Brüggen”. Ik finn, dat is ´n mooi Upgaav, waarto wi weer an de 04.09.2019, 15:00 Ühr in d´ Rummel van dat Oll Raadhuus in Nörden binanner komen willen mit eegen un/of mit frömde Texten.
Jo Adolf Sanders
Keine Kommentare:
Kommentar veröffentlichen