Leev Kulantjes,
för token Freedag, de 04. Oktober 2019, hebben wi weer ´n Platt-Klön-Avend vöörsehn – Klock 19 Ühr (hento hoogstens 21 Ühr) in de Teeköken van de Leezder Möhlen. Uns Rebett sall wesen: “Uns Leven (of dat van uns Ollen of Frünnen) in d´ tweed Oorlog”. De ollere Besökers hebben wiss noch eegen Beleevnissen in un an d´ II. Wereldkrieg hatt, de jungeren kennen Vertellsels, van dat, wat uns Ollen usw. döörmaakt hebben. Lüstig Saken, man ok mall Memorjes komen daar binanner, dat sall woll een mooi Mixtür geven.
As dat anfung, weeren de Kriegsberichten noch vull van groot Verwachtens, Nazis hebben düchtig hör Saak goodproot un annern slecht maakt, Mannlü um uns to – ok ut eegen Famlije – wurren intrucken, dat wurr verboden, utlandske Radiosenders oftohören, Nahbers un annern leet man lunkohren – un ok to unrecht schüllig henstellen, de eerst Suldaaten bleven an de Front dood, de Suldaaten, de SA un de Hitler-Jeugd marscheerte mit Fahnen un Trummeln un Musikinstrumenten döör de Straten, Bomben fullen up uns Staadjes un Husen, Deep-fleegers schoten up alls, wat sük roögen dee, Bunkers wurren upboot, man fung an mit Kanonen un Panzersperren un künstlichen Dook, privaate Minsken mussen hör Stadt verlaaten un uplesst kwamm dat Enn van de mall Oorlog un wi ahmten up, dann kweemen Kanaadiers un Polen in Panzers un mit Lastwagens, för ´t eerst Maal sachen wi swart Minsken, sachen Stuut so witt as wi dat noch nooit sehn harren, allerwegens in de Slooten laggen Gewehren, Granaaten, Zeltplanen, Stahlhelms usw. – un all sowat hett uns wiesnösig maakt un ok animeert... man ik will Jo Vertellsels neet wieder vöörgriepen.
Ik frei mi al up Jo Vertellsels un Döntjes un kann mi ok sülmst noch an vööls besinnen. Wenn wi Glück hebben, dann kummt Froo Lottmann ´viellicht´ ok weer mit, se weet noch vööl mehr daarvan, se was an d´Enn van d´ Krieg ja ok al 13 Jahr.
Hento token Freedag
Jo Adolf Sanders
Keine Kommentare:
Kommentar veröffentlichen