Uns lüttje Leezder Wiehnachtsmarkt

An`d tweed Advent, in´d Wiehnachtstied, is dat in Leezdörp wär sowiet:

Mit Kind un Kägel, Hund vöran, loopen Lü up Möhlen an.

Dor geiht dat los as elke Johr, de Wiehnachtsmarkt dat is mol klor.

De Buudjes stahnt recht nah un dicht, dat föhlt sük an so heimelig.

Dat Weer, dat sörg för Tegenstöten, Rägen bit Middag, Du kunnst vergeten.

Good dat Sünntje leet sük nögen, denn ab twee Ühr löpt int Drögen.

Man böig Wind weih ut Südwest, d´tegenan de Blasders deen hör Best.

Bi Zions Dochder flogen de Noten, Pastor kreeg´n Stutkerl för sein Proten.

In´d Schküür van´d Müllerhus gavt Saken, de uns Tohus komodig maken.

So nüdlich stunn´n se in een Kreis, de Kinnergarden Kinner.

Sungen Wiehnachts-Leedjes nett so stolt, de Olln weern dat neet minner.

Wiehnachtsmann harr ook ähm Tied un maakte all de Kinner blied.

Ut Sack een Stückje Zuckergoot, as Lohn för´d moije Singen,

ook harr för all Lü `n Ohr he noch, wat to Wiehnacht he sull bringen.

De Mann mit witte Bort hett Stress, as letzde Johren faken,

Du glövst dat neet, man jüst dortegen kann he lang nix mehr maken,

wor doch de Görn, noch neetmal tein, all luuthals na´n „Handy“ kreien.

Een Bratwurst tegen de lüttje Schmacht, na´d Glühwienbuud gungt mit Bedacht. Dat was dat smakelk Angebot, so will wi dat, denn geiht uns good.

Börgmester de bedankt sük düchtig, för all de Arbeid -dat is wichtig!

So´n Markt as hier, de steiht un geiht, bloot dör`n Hülpsmann, de wat deit.

Gisela Tebben-Riesebeck