Leev Platt-Frünnen,
is al maal weer sowied, token Freedag, de 07. Feverwaar 20, hebben wi weer uns ´Platt-Avend´ in d´ Teeköken van de Leezder Möhlen, Klock 19,oo Ühr (hento hoogstens 21,oo Ühr). Wi willen over Wapens un Symbolen proten.
Symbolen bünt allerwegens um uns to, wi marken dat al haast heel neet mehr, of dat nu Tallen un Rekentekens bünt of Kenntekenmiddels van d´ Wereld, Karken, Politik usw..
As de meeste Minsken noch neet lesen kunnen hett man de Lü, Bigeevsels todocht, umdat man hör gauer kennen kunn (t.Bsp. Karkenfensters). Firms, Staaten, Vereenen, Sellschupps hebben dat, wat wi hoogdüüts ´Logos´ nömen, Handwarkers hebben hör Tekens, Landkaartenlesen geiht ok blot mit Symbolen, sülmst Slaagersangers hebben een eendüdige Haaruptakeln of Poolen of Hoden, umdat man hör weerkennen deit. Dat Rebett van de Symbolen is sünner Enn.
Van dat 14st Jahrhunnert of an hebben sük de aadelik Familjes Wapens toleggt, ok Stadtjes fungen daarmit an, dat geiht to ´n Deel ok al up Fahnen of Tekens van de Suldaten torügg (kiek na Römers). Uns Oostfreeske Hovetlingen un uns Stadtjes hebben dat ok overnomen. Dotieds muss dat noch de Kaiser of ´n anner Regent good heten, vandaag düürt elke Familie of ok enkelte Minsk sük ´n Wapen toleggen. Man ok daarbi is man neet heel freei, man mutt Gesetzen inhollen. Uns lüttjerde Dörpen hebben meest eerst na tweed Oorlog mit hör Wapens anfangen. Is mooi antokieken un ik hoop, dat wi ok bi dit Thema nett so vööl Plesär hebben as anners ok.
Hento Freedag.
Jo Adolf Sanders
Keine Kommentare:
Kommentar veröffentlichen