Platt-Klön Leezdorf

Leev Lü,

uns Märt-Klön sall wesen an Freedag, de 06.03. 20, Klock 19:00 Ühr (hento hoogstens 21 h) in de Teeköken van de Leezder Möhlen. Wi willen over een heel interessanten Rebett proten, dat heet: “Dat religiös Leven van de Freesen vöördat – un as – se Christen worden bünt”.

Dat liggt nu al lang torügg, mehr as dusend Jahren, man de Freesen hebben sük daar stur mit daan. Se lövden bit to de Tied an sotoseggen Naturgottheiden un hebben dat ok noch bibehollen as se eentlik al as Christen döpt wassen. Wi all kennen de Geskicht van de Freesenkönink Redbad (dat is sien freeske Naam, de Franken nömden hum Radbod). Disse Mann hett al ruugweg 100 Jahr vöör Karl de Groot leevt un sull döpt worden. As he al in ´t Water stunn, hett he noch een Fraag hat, waar denn sien Vöörollen na hör Dood ofbleven weren . Do hebben de Missionaren seggt, de bünt in d´ Höll. Redbad is weer to´t Water utstegen un hett meent, denn wull he lever bi sien Vöörfahren in d´ Höll gahn, as allennig in d Hemel sitten.

Kaiser Karl hett de Freesen mit ´n Overmacht overrumpelt un hör de Freeheid nomen, sien Anliggen weer, dat all sein Unnergevenen Christen worden mussen, dann kunn he beter Baas over hör blieven, wieldat se mit ´n Gott licht to Räson brocht worden kunnen. Sien Missionaren – un he sülmst ok – hebben deelwies mit Gewalt de obstinate Freesen un hör Frünnen, de (Neder-)Sassen, dwungen, Christen to worden. Dat hett noch haast 200 Jahr düürt, bit se dat annomen hebben. Ok de Infall van de Wikingers hangt daarmit tosamen, de wassen dotieds ok noch keen Christen worden un hebben alls wat daarmit to doon hett, in Dulten hauen.

Gifft mennigwat, daarover to vertellen (Slacht an de rood Beek bi Verden usw.). Weer mooi, wenn de een of anner sük daarto ok ´n bietje slau maken kunn.

Hento Freedag.

Jo Adolf Sanders