Septembermaant...

„Schriev `n Geschicht up platt! Septembermaant is Plattdütschmaant“, sä Manfred, Üpperst van uns Blog, annerlessens an mi. Un wiel ik meesttieden up hum hörn do un wiel de Maant bold to Enn geiht, will ik dat nu ok don. Ik hebb nettekraat keen Puul dorup `n Geschicht to vertellen, dat kann ik je `n anner Mal don, ok wiel ik je neet bloot in September Platt proten un schrieven do.

Nützt je nix, nu mutt ik ran. 

De Plakaten mit de Kandidaten för de Dörp-Politik un förd Bundesdag sünd nu wär verschwunnen. Ik harr mi overt Sömmer dor all reinkannt to wennt. Un well, so as ik, dört Vörbifohrn alln bietje vertroot worn was mit de Lü up de groode Schiller ut bunt Plastikstoff, sall dat vielliecht woll nettso gahn hemmen .

De Landschkupp is kahler nu. Keen Mannlü mär in lüttje Büxen un mit unraseert Beenen, de mi bied Moortun um Dreih all tomööt kieken deen. Keen Laschet mär, de and Sandkasten faltenfree un mit schkienbaar een halv Pund Schmink int Gesicht vand Plakat grienen deit. Ok de moije blonde Fro, de Börgmesterschke in Brookmerland worn wull, lacht mi nu neet mär and Sträkweg an. Dorbi kunn sük hör Plakat van allen noch am besten sehn laten, in Gägendeel to de Kanzlerkandidat ut Aachen un mennig annern. In Grootheid harr de Dokter van de swaarte Partei gor de Arms naat Himmel utstreckt. As wenn he up twee mal twee Meter fieftig Stoff upn Wunner hopen de, direkt ind Bundesdag intrecken to können.

Hen un wär sach man ok een Naam ut fiev eenzeln Buukstaben, blau up witt, rumbammeln. Disse Kandidat hett woll and Umwelt docht. Tominst kann he sien Konstruktion in fiev Johrn wär vant Böhn halen, wenn he denn noch Lüst dorto hett.

Bi mennig Plakat hebb ik mi so överleggt, of ik de Offgebildeten noch erkennen wür, wenn se mi wohrhaftig tegenover stahn. Heeln bült Biller, nechgliek of in Tiedschriften of up Plakaten sünd manipuleert, de Lü dorup mit Technik junger un faltenfree, dünner un mit schneewitt Tannen, ohn Ringen unnert Oogen, ohn een gries Haar un ohn een Ollersfleck torecht maakt worn.

Worum is dat so? Wat salln uns disse Biller seggen? Mutten wi up Biller so schienbaar vollkommen utsehn, um wat to gelten un wählt to worn?

Mi geiht disse Jugendwahn gehörig up de Nerven. Ik tro keen ollerde Gesicht ohn Falten. Falten und Naarn sünd Teken vant Läben, de sük in dat Gesicht van een Minschk offbilden. Se vertelln mi, wat mien Tegenöver belävt hett, off he dat stur hat hett un ook, off he mit Bliedschkupp of mit Sörgen dört Läben geiht. Falten um Oogen verraden, dat disse Minschke gern un erelk lachen deiht. Een Bild seggt mär as dusend Worden, heet dat. Is dat so? Ik glööv doran, dat Biller neet immer de Wohrheit seggen. Photoshop Premium? Nä, besten Dank ok. Denn lever unraseert Beenen in lüttje Büxen.

Gisela Riesebeck