Platt-Klöön-Avend in Leezdörp

Leev Plattfrünnen,

nu kummt maal weer ´n Nögen to ´n Platt-Klöön: Wi willen uns bemöten in de Boo van de Leezder Möhlen an Freedag, de 06.Oktober 2023, Klock 19 Ühr (hento sowat 21 Ühr). Dat Rebett is "Dieken-Siels-Slüßen-Schöppwarken in Oostfreesland". De Freesen hebben maal de stolte Spröök up Padd brocht: "Gott hett de Seei maakt, de Freesen hebben de Küst maakt". Daar is wat mit an. De Natüür hett de Küst in d´ Loop van de Tied düchtig verannert, de Freesen mussen daarup antern. Toeerst hebben se Warfen upsett, um dat fruchtbaar Land to bruken. Um de Jahrdusendwend hebben se denn mit Dieken anfangen. Eerst weren de man 2 Meter hoch un in dat Profil anners, as wi dat vandaag kennen. Daarna murken se, dat ´n neei Malör upkweem, dat Water van dat Binnenland kunn neet mehr oflopen. Daarför liggt dat Land to deep, groot Delen unner de Seeispegel. So mussen se Siels erfinnen, de as ´n Ventil dat Water rutlopen laten, man neet herin. Man funn herut, dat dat ok heel alleen geiht, sünner dat Minsken daar stillweg an denken mutten. Mit de Tied kregen se ok Watermöhlens, de dat Water hoogtillen könen. Dann mutten Schippen ok döör de Diek up de anner Kant, rin un rut. So kwemen se up Slüsen. Un as dat Water denn in d´ Binnenland noch allweg wieder Unrüst brengen dee, do hebben se siet sowat 1925 Schöppwarken herutfunnen, um dat Water oftopumpen. Vandaag is dat all noch neet ofsloten. De Waterspegel verannert sük wieder, uns Klima maakt uns Verdreet, un ok de Minsken verannern de Werelt un hebben anner Drang, so geiht dat allweg wieder.

As alltied kriegen wi Tee un Kookjes van de Heimaatvereen Leez, wi geven daarför ´n paar Deiten an de Vereen un bedanken uns all in Vöörn för de leev un lecker Uppass.

Tja, denn man hento Freedag, de 6. Oktober 2023!
Jo Adolf Sanders