Platt-Klöön-Avend

Leev Kulantjes,
nu liggt weer ´n Platt-Klöön-Avend an in de Boo achter de Leezder Möhlen. De sall wesen token Freedag, de 07.Juni 2024 um Klock 19 Ühr (hento sowat 21 h).
Wi willen uns mit "Handwark in d´ Wannel" befaten. Dat is noch heel neet so lang her, dat dat Leven wiedgahns van dat Handwark vöör sük gung.
In elke groter Dörp geev dat Handwarksbedrieven för all Gelegenheiden, t.Bsp. Backer, Slachter, Fisker, Müller, Schuster, Snieder, Sadelker, Kuper (=Böttcher), Diskler, Timmerlüü, Slösser, Smeed, Stellmaker, Mürker, Babutz, Maler, Glaser, Blickslager (= Klempner), Elektriker, Gardener, Horlogemaker (=Uhrmacher), Karkendeener (Küster) un natürelk Weertslüü usw.. Se all harren hör Utkomen. Mennig Beroopen weren ok al an ´t Utstarven of gungen daal, so as Schriever, Wever, Reepslager, Blaufarver, Lojer (=Gerber), Heerder, Ruugwarker (=Pelzer), Nachtloper, Holtköhlenbranner, Tichelwarker u.a.. Beroopen, de för Rieken un för Adligen un viellicht för de Allgemeenheid warkten, so as Jagers, Forstlüü, Meier, Kuutskers, Stuckleggers, Bootsbauers, Brauers, Wienmakers, Kööksken, Lepelmaker, Dookwevers, Putzmakers. Dat geev Spezialisten, Weeldreihers (=Drechsler), Puppendokters, Goldsmeeden, Barnsteensliepers, Scherensliepers, Tapzeerders, Kunstmalers, Örgelbauers, Imkers, Dreihers, Kees- und Bottermeiers of in Burenrebetts so as Döskers, Plooslüü, Melkers, Hoppmakers.
De Liest kann heel, heel lang wesen, all bünt se in Wannel begrepen und hebben neei Dinge upnomen mit mechaansken un techniske Hülpsmiddels. Vööl Handwarkers bünt ok in Fabriken ofwannert. Neei Beroopen bünt entstahn, so t.Bsp. Warktügmakers, Ovendbauers, Schösteenfegers, Automakers. In anner Kuntreien gifft dat heel anner Namen för dat, wat wi kennen. Well weet al, wat ´n Spengler, ´n Zeidler, ´n Beutner, ´n Küfer, ´n Tapper, ´n Tüncher is?
Vööl Lüü hebben Achternamen mit neet mehr bekennde Beroopen, man daar bünt se bleven, sünner dat de een of anner wat daarmit anfangen kann.
So as alltied word um een Gaav för de Heemaatvereen Leez, de uns alltied so mooi versörgt, beden.

Jo Adolf Sanders