wi hebben al weer Junimaant, daar liggt weer ´n Platt-Avend van Oostfreeske Taal i.V. an. De sall wesen an Freedag, de 06. Juni 2025, Klock 19:00 Ühr (hento sowat 21:00 Ühr), in de Oll Boo achter de Leezder Möhlen. Proten willen wi over "Christof Wehking un sien Wark". He is 1924 in Nörden upstahn un he was ´n heel fixen Schriever, vull Spijök. He hett lüttje plattdüütse Vertellsels upschreven, Hörspillen, Theaterstücken, Proot in d´ Krier un in de Oostfreesland-Kalenner. En Sett lang het he ok Baas van de Nederdüüts Theater in Nörden west un 40 Jahr lang Spöler bi desülvig Klottje. Sien eerst Theaterstück is van dat Ohnsorgtheater in Hambörg upföhrt worden. Overleden is he - vööl to froog - 2004. Christof hett 1987 de "Freudenthal-Literaturpries" kregen. Butendem weer he mit anner Schrievers in Oostfreesland un Ollenbörg in de Schrieverklottje un bi dat "Literatur-Telefon Oostfreesland". Van Beroop weer he "Verwaltungsfachmann", 48 Jahr bi de AOK, de Vereen hett he tolesst ok as "Direktor" vörstahn.
De Heemaatveeen Leez versörgt uns weer mit Tee un Backwaren, daarvör geven wi ok geern ´n Spenngaav .
Ik frei mi up de Avend
Jo Adolf Sanders
Keine Kommentare:
Kommentar veröffentlichen