Platt-Klöön-Avend

Leev Plattfrünnen,

´t is weer so wied, een neei Platt-Klöön-Avend in de Oll Boo achter de Leezder Möhlen steiht weer an. Dat geiht ditmaal um "Dat Harlingerland" un dat sall wesen token Freedag, de 04.Juli 2025, Klock 19,oo Ühr (anto sowat 21 Ühr). 

Dat Harlingerland is benömd na de Harle, een lüttje Stroom, de ok al ´n paarmaal verleggt worden is, wieldat de Harlingers dat Oflopen van dat Water ut dat Jeverland neet betalen wullten. Bi de Harle, de heel Waterloop liggt heel un dall in dat Bereck van de Stadt Wittmund, is in dat Middeloller al maal ´n Buggt dör Störmfloden entstahn, man dat is bit nu al all weer inpollert, man proot daar van "Groden". Ja, dat Harlinger Platt is ´n bietje wat anners, as dat, wat wi proten, wo dat kummt, sall dann ok klaar maakt worden. 

Dat Harlingerland is toeerst maal de Kuntrei Esens mit sien Samtgemeend un de Stadt Wittmund, man wi willen, wenn de Tied langen deit, ok noch ´n bietje in de Bereck van Holtriem un Freebörg inkieken. To kieken gifft dat in d´ Harlingerland ´n heel Bült, dat is ´n mooi Landstreek un ok old besiedelt. Ok de Geschicht is wat besünners, de Harlingers hebben sük faak neet so recht mit de Hooftlingen un de Grafen, da ja all van uns Nörden herkomen bünt, anfründjen kunnt. Besünners hett sük daar de Junker Balthasar hervördaan, de was man wat ruug, hett sük mit de Seerovers tosamendaan un ok egen Kaperschippen up de Seei un up de Weser brocht. He hett groot Delen van Oostfreesland, so ok Nörden, in Brand stoken un hett sük uplesst ok noch mit de Bremers anleggt. Dat Harlingerland is dann dör ´n Hochtied doch noch na Oostfreesland komen, waar dat ok henhören deit.

Daar hebben wi ´n heel Bült an to käkeln. Dat is ok alls naar interessant.

So as alltied is uns Gastgever de Heimaatvereen Leez, de uns alltied so best versörgt, un daarum bidden wi ok weer um een Spend för de hör Vereen.

Jo Adolf Sanders un de Mannskupp van dat Plattklottje van uns Heimaatvereen, de elksmaal so mooi mithelpen deit.