Leev Kulantjes,uns token Klöön-Avend liggt an, dat sall wesen an Freedag, de 06. Märt 2026, Klock 19 Ühr (hento sowat 21 Ühr) in de "Oll Boo" van de Leezder Möhlen. Wi willen proten over "Oostfreeske Bruukdoom tüschen Neeijahr un Paasken".
To ´n Bispill liggt daar de Dree-Köningsdag, dat "Anbaden", Leffers, de Valentinsdag, de Hasen-Sylvester, Swienslachten, de Fastnacht-Spektakel un de oostfreeske Förm van de Fastelavend, daar liggen de Ballnachten van de verschillend Vereenen un de Vergaderns "Ollnbörger Landen un Leegmoor-Sellschupp", dat Kohl- of Steekröveneten, de verschillend Förmen van de Wintervergnögens mit dat Ieslopen, Sneeispölen, Struukbessem-Smieten, de Schrickeldag, dat Reithsnieden, de Strieds tüsken Winter un Vörjahr, de Liedenstied van Jesus, de eerst April mit sien Spijöks, Kunfermationen, Palmsönndag, de Still Week mit de Still Freedag, de Paasken-Saterdag mit Paaskefüür, Eierfarven, de Huus-Schummelee, un noch so mennigwat mehr. Dat is mehr van Belang, as sük dat so anhören deit un hett ok alls sien Sinn mit Spröken un Ofsünnerlikheiden und sien besünner Wegen, wo dat entstahn is.
Viellicht fallt Hör all ok noch wat in, woran wi noch heel neet an docht hebben.
So as alltied köst dat nix, wi sammeln blot ´n bietje wat för de Heemaatvereen Leez, de uns alltied so leev mit Tee un wat daarbi versörgen deit.
Jo Adolf Sanders mit de Mannschupp van de Plattdüüts-Kring van de Nörder Heemaatvereen.
