´t is maal weer so wied, de eerst Freedag in de token Maant steiht an un dat heet ok, dat wi uns weer to uns Stammdisk bemöten willen. Dat is dann in de Teeköken van d´ Leezder Möhlen an Freedag, de 02. van d´
Dezembermaant 2011 - 19,oo Ühr (hento 21,oo Ühr).
Unner "Dit un Dat" sullten wi noog maal kört over de hoogdüütse Woorden proten, de sük so Dag för Dag in uns Platt inslieken. Bi dat Theaterstück in Leez van ´t verleeden Maal full dat weer up, man wi mutten heel neet mit hoog Nöös herumtrecken, keeneen van uns is seeker daarför, wi mutten ja man stillweg an so vööl Steden dat Hoogdüütse proten. Man so ´n bietje daarover nadenken kann ja keen Schaa brengen.
Wat wi uns dann wieder vörnehmen willen, is dat, wat wi al verleeden Maal andocht harren, over "Steenhusen un Börgen in Oostfreesland" to kakeln. Wieldat haast in elke Dörp suckse Husen weeren, kann daar seker ok mennigeen wat to bidragen. Un wat uns besünners anhaalt, bünt ja ok de mooi Vertellsels un de Saagen, de daar anhangen.
Hento Freedag - un well neet komen kann of will - de wünsk ik al nu pleseerelke Wiehnachten [dat is ok al weer so ´n Woord, waar dat ´n vööl moojer plattdüütse Utdrück för geven deit: "Karsttied" (´Karst´ bedütt ´Christ´)].
Jo Adolf Sanders
Keine Kommentare:
Kommentar veröffentlichen