OT Platt-Stammdisk Nörderland u. Brookmerland

 Leev Kulantjes,
nu mag ´t ja wall weer gahn mit uns Stammdisk. De sall weesen an tooken Freedag, d. 05.02.2016 – Klock 19,oo Ühr (hento 21 Ühr). Bi de Aard van uns Naamengeeven koomen in mennig Dörpen un Families faak glieke Naamen vöör. De Oostfreesen hebben daarum Binaamen un Ökelnaamen anhangen, um dat se düdelk maaken, well se meenen. Mennig van dee bünt mack (=harmlos), annern klemmen de Beroop d´rachter, mennig welken bünt pläseerelk, man eenigen hangen de Draager ok wat Malls an. Wenn Se um sük to hören of dat Daggbladd leesen, besünners, well d´r dood bleeven is, dann fallt vandaag ok noch up, well  dat tominnstens annohmen hett. Maal sehn, wat d´rbi rutsuuren deit.
Nu willen wi an disse Stee ok noch eeven fasthollen, dat uns Plattdüüts-Beupdraagde, Grietje Kammler, ´n Wichtje in d´ Werelt sett hett. Wi graleeren düchtig daarto (in ´t Rheiderland seggt man ok: Wi feelißiteeren daarto). Un Hans-Hermann Briese hett sien Gedachten to de Dood van Heinz-Hermann Poppen to Papier brocht.                                                               
Weest begröt Jo Adolf Sanders


Heinz-Hermann Poppen
Geboren 17.09.1937 in Auerk
Overleden 26.12.2015 in Auerk

Heinz-Hermann Poppen is neet mehr.
Sien Stimm is neet mehr.
Well sien markante Stimm so geern höört,
Sitt nu sünner sien Talenten.
Is neet vööl van Schriftwark,
In de Hand to nehmen,
De Ogen wat to geven.
Is sien Stimm,
De Ohren to verwennen.
In Radio Oostfreesland.
Hier un daar up Spegelplaat.
In sien moje oostfreeske Taal.
Is sien Stimm,
De de Rüümte inhett,
De van ´t Ohr in ´t Hart rönnt.
Is sien Stimm,
Geschall un Rook,
Verklungen,
Verdreven
Mit de Wulken an d´ Heven.

Hans-Hermann Briese
27.12.2015