Plattproter-Stammdisk

Leev Platt-Lü,
Freedag, de 07. April 2017, Klock 19,oo Ühr (hento 21,oo h) bemöt sük weer de Plattproter-Stammdisk (OT Nörderld-Brookmerld) in de Teeköken van de Leezder Möhlen. ditmaal willen wi over Meeres-Suugdeeren proten.
An uns Waterkant gifft dat Seeihunnen un Kegelrobben, man ok lüttje Walen, so as Swienswalen un Bruunfissen (Tümmlers), mennigmaal ok starvend of overleden Walfissen (Pottwalen u.a.).
Walen – un de daarto hörenden Delfinen - hebben al faak de Schrieverslü  up de Dreev brocht, sük daarover Geskichten un Vertellsels uttodenken – un daarut bünt ok Films maakt worden.
Mennig Oostfreesen hebben in de lesst Jahrhunnerten ok Jagd up Walen in de koll noordske Seei maakt. Daarvan tügen noch de Walbunken-Schütten ( t. Bsp. up Börkum) . Mit heel eenfack Gerätschuppen (Mesten, Piken usw.) hebben se sük in lüttje Bootjes up de gefahrelkste Deel van hör Jageree an de groot Deeren heranwaagt – un wenn se daarbi um d´ Hals komen bünt, dann hebben hör Weedfro-ens un  hör Kinner dat düchtig stuur hat, overleven to könen. De grootste Deeren, de dat noch up de Eer geven deit, bünt de Blauwalen, de amen, as wi, dör Lungen, man de könen doch neet up ´t Land gahn, wieldat hör eegen Masse hör dooddrücken deit.
Ok up Seeihunnen hett man bit in uns Tied herin Jagd maakt. Un wie hebben viellicht ok noch de brutaal Methoden van kanaadske Jagers in d´ Sinn, wenn se mit Knüppels de lüttje Hulers dat Fell over de Ohren trucken.
Dat is ok vandaag noch neet vörbi. Waarum deit man all sowat ?
Up anner Kant maken uns de Seelöwen mit hör elegante Waterspölen un hör Jongleerkünsten in d´ Zirkus of in d´ Zoo ok ´n Bült Plesär. So gifft dat genug to proten un to kakeln.
De Heimaatvereen Leezdörp wünsket sük för Tee un Köst un daarför, dat se uns de Rümten to Verfögen stellen, dat wi ´n lüttje Spend van sowat 2,50 € för een Minsk up dat Tellerke smieten, dat is uns de Saak ja  wall weert.
Hento Freedag
Jo Adolf Sanders