Plattdüüts-Klön in Leezdörp: "De (Oost-)Freesen un de Seefahrt"

Leev Kulantjes,
Freedag, de 02.Juni 2017 um Klock 19,oo Ühr (hento 21,oo h) komen wi weer to ´n plattdüütse Klönavend binanner – un dat in de Teeköken van de Leezder Möhlen. Uns Rebett is "De (Oost-)Freesen un de Seefahrt".
De Freesen gullen al in d´ Ollerdom as groot Seefahrers un wassen Baas up de hoog Seen. In dat Middeloller hebben se neei seeidüchtige Schippen upboot un se hebben düchtig Hannel dreeven. In de upkomend Neeitied sailten se over all söven Meeren. Emden un Nörden wassen tiedwies de Heemaathavens van mehr Schippen as Hambörg of Rotterdam. Van de Eemshavens, so as Weener, Ollersum, Emden un Nörden fuhren ´Schippen over de wied Seei herut´ bit hen na Südamerika un Oostasien. In dat 19. un 20. Jahrhunnert kwammen noch de Kapteins ´up groot Fahrt´ daarbi, de up de Fehns to Huus wassen. To glieke Tied gungen ok de Fiskerschippen bit hento na Island, Grönland un in de Iespolaarmeeren herut. Ok vandaag is t.B. Leer – na Hambörg – de grootste Reedereestandoort in Düütsland.
De Heemaatvereen Leez bidd för Tee un Kookjes um een Spennd van sowat 2,50 € pro Persoon.
 Jo Adolf Sanders