Binnenfiskeree in Oostfreesland

Leev Plattproters,
mien Böskupp kummt man wat laat, ik weet. Dat liggt daaran, dat ik uns Lidd Wilfried Ehrhardt neet ehrder raakt hebb. Wi mussen  ja noch ofproten, of wi token Freedag in Leez blieven of an ´t Bruun Meer fahren willen. De Wiederfahrt kummt neet, wieldat de Weervörutseggens neet so heel gaadelk utfallen. So  blieven wi – as wennt – in de Teeköken van de Leezder Möhlen an Freedag, de 04. August 2017 – 19,oo Ühr (hento 21,oo h). Wi hebben uns utsöcht, dann over de Binnenfiskeree in Oostfreesland to proten.
Toeerst denkt man bi Fiskeree an Seei- un Wattfiskers, man ok in de Meeren in Oostfreesland, de Waterlopen un de Kanaalen gifft dat Fiskers. Dat is neet allerwegens (t.Bsp. fisket nüms in ´t Ewig Meer), man waar dat geiht, hebben de Fiskers Hülp, um de Deeren to fangen. Wat könen se overhoopt kriegen, wat maken se dann mit de Fisken usw.. De eenzigst, de dat noch as Beroop hett, sall an ´t Groot Meer leven. De annern buddern in hör Freeitied. Ok de Sportfiskers sücht man hier un daar, man de düren ok neet eenfack drup daalgahn, de mutten ´n Fiskereeschieen hebben un de kriegen se blot, wenn se an ´n Unnerricht deelnomen hebben un naweesen hebben, dat se dat ok begreepen hebben.
Ik denk doch, dat wi na d´ oll Wennst weer Tee un Kookjes kriegen. Denkt dran, dat wi dann ´n Spenn an d´ Heimaatvereen Leez daarför up dat Tellerke smieten.
Hento Freedag!
Mit beste Gröten
Hör Adolf Sanders