Plattdüütsklön Leez 01.09. 2017

 Leev Kulantjes,
ditmaal bün ik heel froog mit mien Nögen to uns Plattklön in Leez. Dat liggt daaran, dat wi wat umstellen mutten. Ik sülmst – un mit mi Fro Meints, Lübbe Eckhoff un viellicht ok noch annern - könen an disse Avend neet  daar wesen , wi bünt mit dat Frünnenklottje van uns Heimaatvereen up Reis in dat Weserbargland. Dat kunn ik do, as ik de Plaan upstellt hebb noch neet weten.
Man wi hebben ja noch Elfriede Lottmann,  de mit ´n bietje wat Hülp dat Rebett ´Sagen un Märkens´ oftrieten wull. Körtum, Elfriede fallt ok ut, wieldat se ´n Dag daarvör ´n lüttje Operation over sük ergahn laten mutt. se meent, dat se dann Freedag noch neet weer up Kluten kummt. Wat doon?
Well ik anners noch anproot hebb, de Avend mit uns Sagen un Märkens to bestüren, hett ofwinkt, Thema is to stuur. Nu is de Gedacht upkomen, een anner Richtwoord uptonehmen: Wenn nu – mögelsk elk van Jo - een Vertellsel hett of utfinnen deit, de daar vörtobrengen, dann kann de Klönavend – in de wahrste Sinn – to ´n mojen Klöneree worden. Dann is nettgliek, wat dat Rebett van de Döntje is, van Belang is, dat d´r platt proot word. Un well ´n Hoogdüütsen is, hett viellicht wat heel Moois in hoogdüüts, wat Ji dann all mitnanner in uns Platt overdragen könen, kunn doch ok heel lüstig wesen. Mit anner Woorden, Ji könen d´r seker wat mit anfangen.
Ji bemöten Jo – as anners – Freedag, de 01.09.2017 – Klock 19,oo Ühr (dat sall ok ja blot hento 21,oo h gahn) in de Teeköken van de Leezder Möhlen. Un denkt dran, ´n bietje wat Deiten för de Heimatvereen Leez up d´ Schöttelke  to leggen, umdat de uns neet eens Daags rutsmieten.
In Oktobermaant (Freedag 06.10.) komen wi dann dat Maal drup weer tosamen, dann mit "Huusdeeren, de wi neet nögt hebben – Deel II". Bi dat verleden Maal ( is al weer over ´n Jahr her) bünt wi ja  langst neet mit all de Deeren, de um uns to bünt, klaar worden.
Mit hartelke Gröten un völ Plesär
Jo Adolf Sanders