Platt-Klön-Avend in Leez

Leev Lü,
dit is dat lessd Maal in disse Jahr, dat wi to ´n Klön-Avend binanner komen willen. Dat sall wesen Freedag, de 01.Dez.2017 – Klock 19,oo Ühr (hento 21,oo h) in de Teeköken van de Leezder Möhlen.
Uns Rebett is "Oostfreesland – rieke Örgelland". Oostfreesland hett einmaalig vööl oll un würkelk good Örgels. Mennigeen daarvan is in de verleden Jahren restoreert worden, mennigeen was ok so düchtig of, dat se ersett worden muss. Anner Kuntreien bünt niedsk up uns um disse Schatt, Örgels van Arp Schnitger, Holy, Müller, Grotian, Lohmann, Ahrend u.v.a... Disse Riekdom hett sien Ursaak in de good Verdensten, de Oostfreesen mit Seehannel un mit sien Veeh maak hebben. Annerswaar hebben mennig Gemeenden Hals over Kopp de oll Örgels rutreeten in de Tied, as se tomaal wat Deiten up hoog Kant harren, man Oostfreeslan harr do nett nix over. Achteran hett sük dat as Seegen herutstellt. Wi hebben neet blot mooi un klangrieke Örgels, man ok de ollste overhoopt in Campen un de ollste de ok noch spölt worden kann in Rysum. Ok Örgelmakers hebben wi hier, in oller Tieden: Arp Schneitger t.Bsp. hett alleen 20 Örgels in Oostfreesland achterlaten, in neejer Tied gifft dat Jürgen Ahrend in Leer un Barteld Immer in Nörden, de weltwied Örgels upsetten. Viellicht hett de een of anner van Jo ja ok ´n mooi Vertellsel over Örgelspöl, over Balgentreeders usw.
frei mi up Jo
Jo Adolf Sanders