Platt-Klön-Avend in Leez

Leev Plattfrünnen,

ok in d´ Maimaant 2018 -  Freedag, de 04. Mai - komen wi weer to uns Platt-Stammtafel in de Teeköken van de Leezder (Leezdörper) Möhlen binanner van 19,oo Ühr hento 21,oo Ühr. Proten willen wi over oostfreeske Utwanderers ´Waarum, wannher, waarhen´. Jonum ut de Armendeelen, so as de Mooren, bünt massig Lü van hier weggahn. Man ok Unweer, verdürven Arndtjahren, Smacht/Hunger, Veehstarven, Oorlog, Religions-Ruusjes u.v.a. hebben de Minsken tosett. Un dann hebben se van good Mögelkheiden in anner Deelen van uns Eer höört, sük wat Eegens upbo-en to könen un so mennigeen hett dat Aventür up sük nohmen.

Wat mussen se mitbrengen, wo wurrn se upnohmen un verdeelt, wo wurrn se mit de frömd Spraak klaar, mit dat heel anner Klima, mit hör Hartsehr na de Heimaat, mit dat Wied-Utnanner-Wohnen un mennigmaal viellicht ok mit de vörherig Inwohners. Wo un wat hebben se an dat fasthollen, wat se hier lehrt hebben. Vööl van de oll Oostfreesen hebben an hör plattdüüts Moder-Taal fasthollen un de ok an hör Nakomen wiedergeven, wenn se ok faaktieds de hoogdüütse Spraak ofleggt hebben. Wi hebben to disse Avend een Gast nögt , ok ´n Plattproter, Helmut Fischer. He hett in de lesst Jahren vööl Amerika-Oostfreesen upsöcht un hör hulpen, hör Wuddels in de oll Heimaat weer to finnen.

Eenmaal kann he smakelk vertellen un up anner Enn kann he up ´n heel Bült van uns Fragen antern. Wi bünt blied over sien Visiet. As alltied, de Heimaatvereen Leez versörgt uns weer mit Tee un  Backwaren un ik bidd Jo, ´n Spenn van so ruugweg 2,50 € p. P. in de Pott to smieten.

Hento Freedag

Jo Adolf Sanders