Platt-Klön-Stammdisk Leezdörp

Leev Plattdüütsfrünnen, 

de ankomend Freedag, de 02. August 2019 – Klock 19,oo Ühr

(hoogstens hento 21,oo h) hebben wi weer ´n Plattdüüts-Klön

in de Teeköken van de Leezder Möhlen. Ditmaal geiht dat

um Klosters, de dat maal in Oostfreesland geven hett.

De Tall, wovööl dat weeren, is neet heelndall fast to maken.

Dat mutten tominstens 30 west wesen. De verschillendste

Ördens hebben hör Husen hier hat, Dominikaners, Benediktiners,

Zisterziensers, Franziskaners, Prämonstratensers, Johanniters

un noch eenig annern (Froonslü un Mannlü!) . Waar hebben se

west, wat hebben se för ´n Geskicht hatt, waarin hebben se sük

unnerschedt. Wat bünt Bedelördens, wat Besittördens, wat hett

dat mit Blootfotenlopers up sük, well hett de Ördens in de Werelt

brocht, wat hebben se sük föör Upgaven stellt usw.: Mennigmaal

vandaag proot man ok van Beginen, wat bedüdd dat? Waar kwammen

all de Klosterlü her, wat wullen se daar, un wat hebben se för uns

Kultür daan?

Ok in uns Sagen-Vertellsels spölen de Klosters ´n Rull – meest

keen besünners good. Overbleeven is haast nix, laatstens as

de Reformation Overhand kreeg, bünt se all platt maakt worden

un man hett versöcht, all Sporen to verneelen. Worum?

Nörden hett twee Klosters hat, eenmaal dat Dominikanerkloster,

dat uplesst to uns Hoog School worden is, dann dat Kloster

Marienthal, dat – na Ubbo-Emmius – dat mooiste tüsken

Groningen un Bremen west hebben sall. Daar bünt ok de

eerst Cirksena-Grafen to Rüst bedd worden. Man dat Spill

hett uplesst Balthasar van Esens een Enn sett, do hett man

hör Overbleevsels na Emden un later na Auerk henbrocht.

Dat grootste van de oostfreeske Klosters hett Ihlow west.

Dat hett man in lesst Tied weer so ´n bietje upboot, ´n

´Simulation´ daarvan maakt. Haast elk in uns Kuntrei hett dat

al maal bekeken. Lohnt sük !

So gifft dat noch vööl to bekakeln, ´t sall uns wall weer Pläseer

maken.

Hento Freedag

Jo Adolf