De moiste Dag int heele Jahr - dat is de 1. Mai

Dat wuss „uns“ Hannes Flesner all vör anto fieftig Jahrn, dat de moiste Dag int heele Jahr de erste Mai is. Vandaag dürn wi 'n Spierke bedrövt seggen: Wat harr dat doch güstern Avend moi wesen kunnt! Man harr ik und hebb ik sünd Brörs west, seggen oll Lü. Nützt je nix, dor mutten wi dör. Dit Jahr noch, denn hemm wi dat Mallste achter uns. Dorum, leev Leezders, laat uns bovenup blieven. Tokomend Jahr sücht dat anners ut, un wi dürn wär tosamen fiern. Dor bün ik mi säker. Dit Jahr laat uns mit moije Biller an verleden Maifiern torügg denken. Dat helpt uns nu Mood to hollen.

Hannes Flesner sien Leed vant 1. Mai geiht so:

De moiste Dag int heele Jahr

dat is de 1. Mai;

Bi'd Teltfest kriegen de Olln sogar

nochmaal ganz fix de Dreih.

Se danzen un danzen bit mörgens um veer,

un drinken so mennige Schnapsen un Beer;

Bi jede Damenwahl

dor singt de heele Saal:

Oh Kinners nä, wat geiht d'r bi lang!

Dor kweemen twee Jungs ut Naberdörp,

de wulln de Maiboom klauen;

Man Freerk un Harm de passen up

de hemm' hör fix verhauen.

Nu harrn se dat wunnen un dor kweemt up an,

un nu fung dat Teltfest erst rechtschkapen an;

Se kreegen de Hals nich vull

un sungen mit Gebrull:

Oh Kinners nä, wat geiht d'r bi lang!

Man anner Mörgen de Dag um elv

proot nüms mehr van Pläseer;

Dor leeg dat heele Dörp in suur

wat'n Glück dat Sönndag weer.

Uns Freerk, de harr nett so'n Dörst as'n Peerd,

un futer, nu bün ik de heel Dag nix wert;

Krieg eenfach nich de Dreih

dat kummt van 1. Mai.

Oh Kinners nä, wat gung't d'r bi lang!

Hier noch äben de Link up dat Leed von Hannes Flesner bi Youtube, un denn willn wi uns freien up uns Maifier anner Jahr. 

https://www.youtube.com/watch?v=g5x8tOC25Oo

Wat toletzt besungen worden deiht, passeert uns vandag to'n Glück neet.
Hollt Jo munter un blievt tofahrt!