kummt weer ´n Platt-Klöönavend up uns daal, wi willen uns bemöten an Freedag, de 03.Juni 2022, 19,00Ühr (hento sowat 21h) in d´ Leezder Möhlen, ik weet noch neet, of in d´ Bo (mögelsk woll) of in d´ Teeköken. Uns Rebett sall wesen “Uns Wildblomen”. Nu, in de Vöörjahrs- un Vöörsömmertied is weer alls so mooi an ´t Bleihen. dat is an de Weegranden, up Schuttkuhlen, up mennig Ackers, Meedjes of in d´ Grasland, an fuchte Steden un waar anners noch all. De meeste Minsken kennen de “normaal” will Blömkes.
Man dat Weeten um hör word stillweg minner. In de Scholen word haast neet mehr daarup henwesen, de “intensiv” Landwertschupp filtert meest all wild Saadereejen ut dat profitelk Saadgood herut, so kummt daar nix mehr wild hoog. För uns Ogen is dat man ´n tristen Ankiek, man de wild Soorten bünt neet unnütz up uns Eer, de hebben ´n Sinn. Hen-un-weerdenn kann een al sehn, dat ´n Umdenken insetten deit, man noch neet genoog. Wi willen uns de wild Blömen ´n bietje mehr ankieken un vöör alls ok de plattdüüts Namen weer in uns Bregen torügghaalen. Dat gifft mennigmaal för heel verschillend Planten glieke Namen, so t.Bsp. “Kattsteert”, man unnerschedd de dör Bitobegreepen, so as Moor-, Water-, Meedje-, Weg- usw., man dat gifft ok heel raar Namen, so as “Antjemöh-wo-laat-is-dat”. Ik will hopen, dat Se ok de een of anner Naam paraat hebben.
Intree bruukt nüms betahlen, man de Heimaatvereen Leez gifft hör Rümten för uns free un versörgt uns mit Tee un Kook/Kookjes, daar bidden wi um een Gaav van so ruug weg 3 € p.P. för de Vereen.
Hento Freedag
Jo Adolf Sanders
Keine Kommentare:
Kommentar veröffentlichen