Platt-Klöön-Avend in Leezdörp

Leev Plattfrünnen,

´t is al weer een Maant um, un een neei Klöön-Avend liggt an. Wi bemöten uns an Freedag, de 01. Juli 2022 um Klock 19,oo Ühr (hento 21h), in de “Boo” bi de Leezder Möhlen (d.h. keen Trappenstiegen !). Uns Klöön sall gahn over “Wilhelmshaven un de Jadebusen”.

De Jadebusen is al een oll Seei-Inbröök, de sük in mennig Störmfloden herutbild hett. Daar bünt ´n heel Bült Dörpkes in unnergahn, man man hett ok mennig Land later weer torüggwunnen.

As in dat 19. Jahrhunnert dat Köningriek Prüßen allweg groter wurr un de anner groot Staaten, so as Engeland, Spanien, Portugal un Frankriek, een Overseeikolonie na de anner upnehmen deen, do wull ok Prüßen daaran deelnehmen un muss een Seeihafen hebben. Man harr tovöör ja al Oostfreesland mit Emden, man dat hett man na 1815 weer an dat Köningriek Hannover ofgeven musst. De Prüßen wullen een Kriegshafen upbo-en un daar hebben se sük an dat Land Ollnbörg hollen un een Stückje Land van deen ofköfft, dat was an d´ Jade. Daar hebben se denn hör Marine futthulpen un bünt in de Hannel mit Kolonien instegen – man de Werelt was al haast heel updeelt, do was neet mehr vööl to halen.

Wilhelmshaven hett in de beid Wereltoorlogs vööl ofkregen. Man de Minsken daar hebben alltied weer neei anfangen und mittlerwiel een modeern Stadt daarvan maakt, de neet mehr blot van dat Militär regeert word. Sliektau/SIiektown is dat al lang neet mehr. Ik hoop, dat de een of anner ok wat daarvan vertellen kann. Dat düürt denn ok in Hoogdüüts wesen.

Tja, denn hento Freedag, de Heimaatvereen Leez verwacht för Tee un Geback van elk as Gaav 3 €, ik lööv, dat is de Saak ok woll weert.

Jo Adolf Sanders