Bi Johanna un Idäus is elke Maant een Plattdüütskmaant - se prooten an all Dagen platt

Johanna un Idäus up Pütt bi hör Ollenhuus in'd Tuun

Moin!

Wi sünd Johanna un Idäus ut Leez. Wi sünd 13 un 11 Jahr old un gungen beid up uns Leezder Dörpschool. Uns Börgmesterske Froo Riesebeck froog, off wi mal wat in d´ Leezder Blog schrieven wullen. Dat hebben wi denn in d´ Harvstferien ok maakd un vörbereid, as wi in d´Zug na Bremen seten.

Wi sünd neet bloot sportlig mit Football, Leichtathletik un DLRG-Schwemmen unnerwegens, man ok up platt. Wi prooten siet wi denken können, mit uns Familie plattdüütsk un mit de en of anner, de weeten, dat wi platt prooten können.

Platt lesen full uns to Anfang avers neet to. Dat mussen wi doch düchtig öven, daarmit dat gladd over de Lippen kummt. Man de Flietigheit hett sük woll lohnd. Bi de Kreisentscheden sünd wi beid wiederkamen un dürsen na de Bezirksentscheden na Auerk. De Busreis mit Sparkass na de Landesentscheden in Hannover weer heel wat Besünners. Un dat ik as lüttje Fent tüsken fiev Wichter de tweede Platz haald hebb, mook dat Beleevnis perfekt. Daarmit haar ik neet rekend, denn de Wichter weren ok good.

Disse Jahr is dat weer sowiet, de Weddstried geiht in de nächste Runn. Natürelk maken wi ok weer mit. Uns Mesters hebben wi daarup al anproot. Dit Maal wullen wi uns egen Geschicht vörlesen, de wi sülvst beleevd hebben. Villicht düren wi ja anner Jahr weer mit Sparkass na Hannover fahren. Wi würren uns düchtig daarover freien un doon uns Best. Wi hopen, mit uns Bidrag ok anner Kinner to overtügen, bi d´ plattdüütsk Leesweddstried mit to maken. Dat maakt up jeden Fall vööl Spaaß un helpt, uns Moderspraak neet utstarven to laten.

Besten Dank an Mama för hör Hülp!

Foto: privat