is al weer ´n Maant up, nu liggt de neei eerst Freedag in d´ Maant November an. Wi willen de ofhollen an Freedag, de 07.11.2025, Klock 19 Ühr (hento sowat 21 Ühr) in de Teeköken van de Leezder Möhlen. De Heimaatvereen Leez bruukt de Oll Boo sülvst för sien Theatertrupp. Wi hebben uns dat Thema "Störm un Störmfloden in Oostfreesland" rutsöcht un willen daarover proten.
Wat is Störm, wo kummt de tostann, wat för Störms gifft dat overhoopt up de Werelt, wo kummt dat to ´n Störmflood an uns Küst, welke Störmfloden hett dat bi uns geven un wat hebben de anricht, warum bünt de groot Störmfloden eerst so ruug weg van dat Jahr 1000 n.Chr. of an so stark worden. Warum wurren se mit elke Jahrhunnert hoger. Wo is man daar tegenan gahn, waarum bünt de Dieken faak weer broken, wo un waar is dat dann to de Landverlusten komen, un warum bünt daar sovööl Deren un Minsken bi to Dood komen (Dullert, Hilgenrieder Bucht, Harle-Inbröök, Jadebusen, de Fluss-Trechters usw.). Warum hett man haast nix unnernohmen, wenn de Minsken all hör Reew un hör Existenz verloren harren, warum is maal Holland, de Elbe of Sleswig-Hollsteen starker truffen worden, waarum mennigmaal mehr Oostfreesland.
Wat hett man ut de enkeld Floden leernt un wo hett man dat umsett, um dat Malöör oftohollen. Dat gifft seker noch vööl mehr Fragen. Warum könen wi uns vandaag enigermaten seker föhlen un wat kann de Klimawannel na sük trecken?
So as alltied, kösten deit uns Tosaamenkummst nix, wi worden weer versörgt van de frünnelk Frolüü un willen daar ok geern ´n Spend för de gastgevend Heemaatvereen Leez overgeven. Denkt ok dran, dat wi annermaal in Dezembermaant al Verwachtenstied hebben un ok al mal Neeijahrskookjes bestellen könen, de daar ok so lecker maakt worden.
Bit hento Freedag
Jo Adolf mit de Plattdüütskring van de Heemaatvereen Nörderland.
Keine Kommentare:
Kommentar veröffentlichen