Platt-Klöön-Avend

Leev Plattfrünnen,

is weer sowied, steiht weer ´n Platt-Klöön an. De sall wesen an Freedag, de 07.August 2026, Klock 19 Ühr (hento so ruugweg 21 Ühr). Wi willen proten over "Swartbrannen, Swartslachten u.ä.", so as dat an d´ Enn van de Groot Oorlog was un in de Tied daarna hento de Dag, as dat neei Geld, de DM gaff..

 Bit daarhen kunn man nix so recht kriegen un wi mussen uns sülvst wat vermaken. Nüms wull geern an de Üppersten wat ofgeven, un de langten man deftig to. So hett man sük wat infallen laten, de Gebodens un Verbodds to umgahn un hett so eenigs "swart" maakt.

T. Bsp dürß man blot _een_ Swien slachten un Alkohol dürß man ok neet drinken. So bito geev dat ok so eenigs, wat neet verboden weer, man wat mit Meite hertostellen was, so wurr Sirup kookt, Obst in Glasen konserveert, dann kwamm dat Maisbrood up, wiedat man Koorn (dat is bi uns Rogg) mit "corn" oversett hett un dat is in Amerika "Mais".

Brannmaterialien gaff dat ok neet, man hett vööl Bomen ofsabelt, Törf stoken un de Köhlen-Iesenbahntrecks bestohlen. Ok de Buußkohl-Lasters, de van Wybelsum na de Ruhrpott unnerwegens wassen un dör uns Dörpen döörmussen, beklaut. de Hamsterers kwammen in Scharen van de groot Stadtjes up dat Land, um sük wat tosamentohalen, de hebben ok faak wat intuusket, de hebben mennigmaal ok bedrogen, man uns Lüü hebben de ok mennigmaal beduppt. Dat was ´n mall Tied un dat sull neet vergeten worden. De Tiedtügen, de dat noch sülvst beleevt hebben, worden minner. So is dat ok för de, de junger bünt, doch noch maal mooi to hören, of ok de Vertellsels van uns Vöörollen uptowarmen.

So as alltied is dat Deelnehmen umsünst, wi gadern blot ´n Spend in för de Heemaatvereen Leez, de uns alltied so mooi versörgen deit.

Jo Adolf Sanders un de Plattdüütskklottje van de Heemaatvereen Nörderland