dat geiht all weer fix up de Oktober an un daar liggt ok weer ´n Platt-Klöön-Avend an. De sall ditmaal neet an de eerst Freedag wesen. Dat is noch sotoseggen in een verlangert Weekenn, daarum hebben wi uns all futt up de tweed Freedag, de 09. Oktober 2026 verleggt.
Wi könen dann ok neet in de "Oll Boo" wesen (an beid Terminen neet), wieldat daar ok de Plattdüütsk-Theaterlüü van Leez de Oll Boo för hör Theaterspill in Beslagg hebben un daar hör Spill upföhren. Wi mutten also weer in de gemüdelke Teeköken van de Möhlen-Packhuus uns Vergadern ofhollen un so hebben wi ok dat Rebett wesselt, wi trecken en anner Thema vör. Uns Platt-Klöön geiht also um de Flucht ut de oostdüütske Provinzen an dat Enn van de groot Oorlog, as Massen van Lüü flüchten mussen, wenn se neet in de Hann van brutaal Russen fallen wullen. För disse Avend hebben wi Jochen Strybny wunnen, de sülmst flüchten muss, man ok good platt (oostfreesk) proten kann, dat hebben de Kinner do ok heel gau leert, denn eerst dann hörten se to uns.
Jochen un ok ik wassen, as dat Enn van de Krieg angung, tüsken 7 un 8 Jahr old un hebben all so mennig wat mitbeleevt. Jochen muss ut Oostdüütsland(ut Slesien) oftrecken, ik hebb to de Tied (mit mien Moder ) in Koblenz wohnt un ok wi mussen do ut de Stadt rut un harren na Thüringen utwieken musst.
Man mien Moder hett sük anners entschedd, se hett versöcht an dat Enn van 1944 na Oostfreesland torüggtokomen. Dat hett sük in mien Memorje ok good inbrannt. Jochen seggt - un daar hett he recht - wi bünt de letzt Tiedtügen, de dat noch beleevt hebben, uns Kinner aver weten daar neet mehr vööl van. Jochen hett sien Beleevnissen in en Bookje daalschreven un ok ik bün daarbi, dat wat mi noch infallt, uptoschrieven. Wi hebben mennig Parallelen daarbi faststellt . un daarvan willen wi vertellen. Well van Jo Bekannten hett, de ok wat bidragen könen - of ok de, de overhoopt wat van de mall Tied weten, könen dann ok to Woord komen, ik kann mi vörstellen, dat dat heel klörig wesen kann - un ok Fragen könen daar vörbrocht worden.
As alltied is dat an de Freedag, de 09. Oktober 2026, Klock 19:00 Ühr (bit hento 21:00 Ühr), ditmaal in de Teeköken van dat Packhuus mit de smaal Trappen, dat is spietelk, daarum könen eenigen ok neet komen, man dat is nu maal neet to annern.
As alltied worden wi weer van de röhrig Damen van de Heemaatvereen Leez versörgt. Kösten deit dat nix. wi gadern blot ´n (freewillig) Spend in för de Vereen in Leez un hopen daarup, dat doch noch ´n Bült Lüü komen. Bit denn
Jo Adolf Sanders un de Plattdüütskring van de Nörder Heimaatvereen
Keine Kommentare:
Kommentar veröffentlichen