Platt-Klöön-Avend

Leev Kulantjes,

token Freedag, de 04. November 2026, is weer ´n Platt-Klöön-Avend ansett in de Teeköken van de Leezder Möhlen, Klock 19 Ühr (bit hento 21 Ühr). Thema is "De oostfreeske Buren Plaatsen - un wat darut worden is".

De oostfreeske Burenhusen hebben jahrhunnertenlang dat Bild van de oostfreeske Landschupp utmaakt. Dat hett sük so langsaam entwickelt un gung bit hento de 1960-er Jahren van dat 20. Jahrhunnert, daarna kwamm een Wannel in de Landwertschupp up, groot Maskienen, overnammen de Arbeiden mehr un mehr un de Naürschutz verlangte een Umdenken för de Wohlfahrt van de Deeren. So kunnen de Buren neet wiederwarken, as se dat de Jahren tovör daan harren. De Plaats in de oll Förm harr utdeent. Nu verfullen de Plaatsen un ´n heel Bült bünt al ofreten worden, se verswunnen een na de anner.

Nu sall noch maal klaarstellt worden, wo se so worden wassen, as wi hör meest noch all kennen. Man versöcht in de Tied daarna, dat Butenbild van de staatske Plaatsen overleven to laten, man mutt hör neei Upgaven toföhren.

Welke dat wesen könen, daarover gifft dat ´n Bült Bispillen - un dat willen wi ok daarleggen. Ok de Namen van de Plaatsen bünt interessant un dat gifft so Begrepen as "Grashuus, Schatthuus, Buskplaats usw. ", dat word ok anproot.

Dat is spietelk, dat wi de mall Trappen anhoog na deTeeköken nehmen mutten. De Heimaatvereen Leez bruukt sien "Oll Boo" för sien Theater-Upföhren, man wi hebben ´n Lienwand upboot, sodat wi ok Biller wiesen könen.

So as alltied word keen Intree nomen, wi bidden blot um en Spend för de gastgevend Vereen, de uns alltied so mooi mit Tee un Kookjes of Krinthstuut verwennen deit.

För de Plattdüütskkring van de Heimaalvereen Nörderland, de dat alls uparbeidt hebben
Jo Adolf Sanders