Platt-Klön-Abend in Leez

Leev Plattfrünnen,

token Freedag, de 03.05.2019 – Klock 19,oo Ühr (hento hoogstens 21,oo h) bemöten wi uns weer in de Teeköken van de Leezder Möhlen. Ditmaal geiht dat um de “Hoovtlingen un de eerst Graafen in Oostfreesland”. Hoovtlingen (Häuptlinge) wurren de Mackers in de oostfreeske Karkspillen van de Begünn van de 14. Jahrhunnert of an nömt. Se harren stillweg Ruusjes mitnanner, dat gung smaals daarum, dat se all dat Seggen in heel Oostfreesland hebben wullen. De eerst, de dat mitlopen dee, was Okko tom Brook, na hum kwammen sien Söhn Keno un dann sien Grootkind Okko II. Man tüskenin – un vööralls achteran – kwammen d´r neei Utnannersettens, bi de an d´ Enn de Cirksenas, dotieds Hovetlingen van Greet, as Winners herutsurten. Ulerk Cirksena wurr in d´ Middent van de 15. Jahrhunnert de eerst Graaf van Oostfreesland, sien Söhn un Nakomer was Edzard, de later de Binaam ´de Groot´ anhangen wurr. Daarmit harr de Familje de grootste Macht kregen. Edzard sien Grootsöhn hett sogaar in de europeeske Hoogadel herintro-en kunnt.

Okko I un  de eerst Cirksenas harren ok fixe Frolü achter sük. Wat daar all so oflopen is un wo dat all komen is, dat willen wi bekakeln. Well wat weet, sall dat driest vördragen, mennigwat is ok heelundall verdreiht overlevert worden. Ik frei mi al up Jo Neeisgier un up Jo Fragen.

Wi bünt Gasten bi de Heimaatvereen Leez un willen an d´ Enn ok ´n paar Deiten up ´n Tellerke leggen, anners köst dat nix.

Hento Freedag
Jo Adolf Sanders