Siet verleden Freedag hett uns prachtich bunt schmückt Maiboom dat in’d Schküür van‘ d Müllerhuus uthollen musst, man nu steiht he up Dörpplatz an’d recht Stä. Halv Leez weer de achterto. Kinner un Olln saten up Anhänger van veer Treckers, de van’d Möhln naat Leezwech overt Karkwech dwas dör Leez bit henn naat Heidwech fohrn sünd. Achteran Jann Wunder mit de Boom. Mannlü van‘d Füürwehr harrn de’n Oog up un hemm Pad un Krüzungen offsäkert. Dat Upstellen mit Hülp van Hannes Hogelücht up Trecker tosamen mit‘n bült Anpackers is good mitloopen. Mähr Groten un Kinner as anner Johrn stunnen dorbi un leeten sück Wursten un Drinkeree düchdich schmaken. Dat was heel na’d Mütz van Börgmester Wirringa. He freite sück dorover dat Leez so moi tosamenholt un mitnanne anfaaten deiht. Good ankamen is dat Lagerfüür, dat Horst Janssen mit sien Dörp Arge up Beenen stellt hett. Kinner kunnen van hum Stocken un Deech för smakelk Stockbrod kriegen. Ook de Groten hemm sük doran warmholln. Bit fro mörgens saten’s up de Strohballen umto. Un de Darbeeden van’d „Line Dancers“, de in Riegen danzen dohnt, hemm de Lü ook good gefallen. De Leeden van Leezder Vereenen hemm heel Nacht good uppasst dat keen een de Boom mit Spa to nah kamen is.
Vör ruchwech 1300 Johrn sall de hilige Bonifatius, de ook de Freesen hör christlich Gloov brocht hett, mit düll Kopp een olln eeken Boom platträten hemm. Disse Eek van Geismar (in Nordhessen), so is dat overleefert, was in Mai to Ehr van de heidnisch Gott Thor torecht maakt west un dat hett Bonifatius neet passt. In Loop van Johrhunnerten is dorut uns Maneer mit de Maiboom entstahn. Vandaag freien wi uns doröver dat wi de Wintertied nu achter uns laten können.
In Leezdörp höben wi uns um uns Bruukdom keen Sörgen to maken – dat löppt.
Gisela Tebben-Riesebeck
Zusätzlich noch einige Bilder von Gisela Tebben-Riesebeck:
Keine Kommentare:
Kommentar veröffentlichen