Van uns 33. Möhlenfest

Wenn de bunt schmückt Flögels sük an’d tweede Saterdag in August in’d Wind dreien, is halv Leez wär up Pad naat Möhlen hen. Un ook mennig Lü ut Kuntrei besöken dat Möhlenfest van‘t Heimatvereen. Dat dreeundartigste all dittmol. Veerundtwintig Andachten harr he all an disse Stee holln, vertellte Pastor Riesebeck, de as elke Johr een lütjen Andacht to Anfang holln het. He hett over de Bedüten van de Tradition in Tosamenhang mit dat Leezder Möhlenfest proot. Tradition heet, neet de Asch uptobewohren. Tradition bedütt, de Flamm wieder to geven. Ok Börgmester Wirringa wull sien Grötens losworn un weer blied, dat wär so völ mit anpacken doon. Nett so ok Vörsitter van’t Heimatvereen Gerke Hugen. De gav dat Woord wieder an Fredy Fischer, Börgmester van Grootheid un de Schirmherr disse Johr. In sien Egenschaft as Baas vant Möhlenpott in´t Landkreis, kunn he sien Weeten over dat Möhlenwark good an’t Mann brengen. Halswark harr he bloot dormit, de schwarte Schirm, de Gerke Hugen hum as een Teeken för sein Amt overgäben harr, uttoklappen. Schuld doran was de störmige Wind. Tominst weer he neet kolt, dat maak wat ut, broch abers `n poor düchtig Schuurn mit. De Stimmung kunn dat nix anhemm. De Lü verkropen sük kört un denn gung dat wieder. In’d Middelpunkt stunn dat Ackerwark mit Döschken un Kartuffels rüden mit oll Maschinen un Treckers. Verschmachten of verdörsten muss ok keen een. Bied Landfroon kunn man lecker Aartsopp kriegen un sülvstbacken Kook mit Tee gaff dat in’t Boo. Ok to hebben wer Pommes, Grillwurst un handwarklich makt Brot ut Backhus. Heel un dall kwamm dat Handwark neet to kört: De Frolü in de Buud mit de Spinnraden hulln Strangen mit Schaapwull för warm Bostrocken of Socken vör, un moi Reef ut Kunsthandwark stunn in’t Remise un in’d Schür van’dt Müllerhus.

Gisela Tebben-Riesebeck

Die Jagdhornbläser in Einsatz beim Mühlenfest

Die Besatzung des Infostandes des Heimatvereins, Manfred Wirringa, im Gespräch mit Jann de Buhr

Jann Wunder und Johannes Hogelücht roden Kartoffeln

v.l. der Vorsitzende des Heimatvereins Gerke Hugen, der Leezdorfer Pastor Peter Riesebeck, der Schirmherr des Mühlenfestes und Bürgermeister der Gemeinde Großheide Fredy Fischer und Leezdorfs Bürgermeister Manfred Wirringa 

Fotos: Folkert Bents, Gisela Tebben-Riesebeck