Platt-Klöön-Avend

Leev Kulantjes, dat is weer so wied, uns token Platt-Klöön-Avend sall an Freedag, de 03.05.2024, Klock 19 Ühr anfangen un geiht bit haast 21 Ühr. Un dat sall wesen in de Boo van de Leezder Möhlen. Uns Rebett is : "Oostfreeske Bargen un Höchten". In uns platt Land van Bargen to proten un over Bargen to proten is ´n Witz, man wenn man in de Kaarten kickt, dann find man eenigen, dat mutt ja ´n Grund hebben. Natürelke Höchten bünt in Oostfreesland

"Binnendünen", so t.Bsp. de "Hollsand " bi Kleinoldendorf/Uplengen, dat is 18,6 m hoog denn gifft dat "Seeidünen" t.Bsp up dat Eiland Langeoog mit over 21 m. Wo beids tosamenkummt sall klaart worden. Wi hebben ok dat Tegendeel, de leegste Steh in Düütsland an dat Uttumer Meer mit haast -2m. Groot Steden in de Riepster Hammerk bünt deeper as dat Seeiniveau

Well kennt in Oostfrfreesland neet de Plytenbarg van Leer, ja dat is mooi to vertellen, de is 12 m hoog. Wennher de upsmeeten worden is un waarum, weet nüms mehr, so sünd daar de Sagen insett worden, de Eerdmanntjes. Ik vertell de Lüü dann, wi hebben wall keen hoog Bargen, man wi hebben endlöss lang Bargen van haast 400 Km, de Dieken. Daar kunnen wi mit Slee andaal jukeln an de "dootieds steil Binnensied", daar kunnen wi Eiertrüllen un unnern in d´ Land wurren Eier smeten, so hoog un so wied wi man kunnen, de gungen neet so liggt kött.

Wenn man up Diek steiht, dann sücht man ok mennig anner Höchten: Karktoorns, Füürtoorns, Windraden, Masten, Denkmaals, Warfen, Möhlens usw, Gebauten, de man froger as "Landmarken" för de Schippverkehr utnützt hett. mennig Masten kann man sehn, t. Bsp. de Funkmast van Auerk-Popens, vöör alls savends bi Lücht. De is haast allerwegens to sehn rund um uns to, of van Weener of van Esens, van Norddiek bit naa Ollenbörg. Man dat hoogste is de noch neet, dat sünd de Marine Längstwellenmasten van Ramsloh, an d´ Rand van Oostfreesland. Dat sünd Masten van 353,7 m Höchte, de hoogste to begahnde Masten van heel Europa. Neet maal de Eiffeltoorn van Paris kummt daar tegen an, de is "blot" so ´n bietje over 300 m hoog.

Ik hebb mi mit de Höchtematen stuur daan, haast nargens sünd de Höchten to finnen, man markt, dat wi in platt Land wohnen, daar tellen suckse Höchten haast neet.

Hento Freedag, 

Jo Adolf Sanders