Wi Landfroen un de Landliebchen harren dit Jahr de Ehr, dat Neeijahrsbegröötnis uttorichten. Dat hebben wi geern daan un mit Liev un Seel weren wi daar all mit bi.
Wi hebben in uns Oll Boo van de Heimatvereen inladen un harren Halswark, all uns Gasten unnertobrengen. Hunnert Lüü ut Leez harren sük to dit Beleevnis anmellt un sünd ok komen.
Wo seggt man so mooi: Wi platzten ut all Nahden, aver doch hebben wi dat all good schiert. An d‘ Döör wurr elke Gast mit en Glas Sekt in Empfang nohmen. Dat Begröötnis hebben de 1. Vörsitterske van d‘ Landfroen Heike Stürcken Peters un van de Landliebchen hör Orga-Team, Marina Haberzettl maakt un uns Gasten en hartelk Willkomen wünskt. Leider Gotts is uns Pastoor, Peter Riesebeck, ut gesundheidlichen Gründen de Avend feern bleven. Dat hebben wi düchdig beduurt. He is anners alltied daar mit bi un lett sük dat ok neet nehmen.
En heel besünners utföhrelk Jahresbericht hebben wi van uns Börgmesterske Gisela Riesebeck to hören kregen. Se harr unnöselk vööl van so mennig Beleevnis to berichten. Wi weren all mitnanner platt, dat Leezdörp in dat lest Jahr so vööl up de Benen stellt hett. Daarför hebb ik mi bi Gisela van Harten bedankt un ok noch ‘n paar Woorden seggt. Ja, för uns Leezdörpers mutt mennig een sien Hood trecken. För dat, wat daar all maakt word un wat ok de Verenen berieten un to dat Leven in Leezdörp bidragen is man sühnig to beschrieven. Ik persönelk kann dat heel good naföhlen. Jüst bi Gisela un mien Aktion um Leukin un för Ernst Moltz! En Umfraag un de Leezder Verenen weren daar, um to helpen, to koken un to backen. Se hebben all mitnanner anpackt un wi hebben uns tegensiedig hulpen un unnerstützt. Wi harren ‘n heel groten Toloop un dat Resultaat weren 2300,- €, de wi all mitnanner an de Vereen Leukin overgeven kunnen. Sowat kann man blot, wenn man an en Strang treckt, un dat makt dat Levend in Leez ut. Dat kann neet beter!
Wi sünd butendeem ok naar stolt daarup, as eenzig Gemeent in uns Brookmerland noch to ‘n Neeijahrsbegröötnis intoladen. De Landfroen harren up Tied Tee henstellt un lecker Brüggens mit Kees un Mettwurst smeert, so dat elk un een sük dat in de Schofftied good gahn laten kunn.
Uns Filmteam van de Dörp-Arge hett uns achteran ‘n wunnerbaren Film präsenteert un uns würkelk overrascht un heel besünners blied maakt. „Leezdorf „gestern und heute“ eine Reise durch die Zeit. Teil 4: Landfrauen in Leezdorf!“ Wi menen, wi weren en Deel van de Film, man dat sük dat all over uns un um uns dreihde, hett uns de Spraak verslaan. Wi weren platt as ‘n Pannkook! Heel spietelk weer allerdings, dat uns Landliebchen ut tiedlich Grünnen keen Termin mit de Filmteam togang kregen hebben un somit in de Film neet vörkemen. Dat Filmteam geböhrt en heel groten Dank för all hör Müh, Tied un Arbeit, de se daar instaken hebben. Ik segg: „Jungens, dat hebben ji heel mooi maakt, dat harr ik neet beter kunnt!“
Tegen Ühr of teihn is de Avend to Enn gahn un na mien Dünken hebben wi Leezder Landfrauen un Landliebchen keen Kösten un Meiten schööit un uns Gasten en heel vergnögten Avend bescheert.
Else Bontjes
Das Redaktionsteam des Leezdörp Blogs danke Else Bontjes ganz herzlich für ihren äußerst gelungenen plattdeutschen Bericht zum Neujahrsempfang. Zudem danken wir Else Saathoff für die Übersendung und Bereitstellung der von ihr angefertigten Bilder.
Keine Kommentare:
Kommentar veröffentlichen